Virtudes - FRAGA, XESÚS

Editorial: GALAXIA EDITORIAL - Idioma: galego - 368 páginas

Premio Blanco Amor 2019 Contar a emigración desde a parte dos retornados. Velaí o obxectivo que se propuxo Xesús Fraga ao encetar esta novela que é, sobre todo, o relato dunha epopea como a que protagonizaron tantas mulleres galegas que, levadas pola adversidade, rematan percorrendo o mundo á procura dun futuro mellor. Xesús Fraga constrúe unha historia que se centra nas vicisitudes dunha familia das Mariñas coruñesas marcada pola emigración, historia que tamén é a da segunda metade do século XX, e que vai medrando coma quen vai pintando un lenzo a base de sensacións, recordos, fotografías, o diario dunha nai e a voz das testemuñas que poden contar. Unha obra que ten moitas lecturas e moitos vieiros, polos que o autor nos leva coma se fosen as liñas do metro de Londres, a cidade ao redor da que gravitan os personaxes da novela. É, tamén, a historia dun neto asombrado e dunha avoa poderosa. A historia dos que marchan e que, cando regresan, nin eles son os mesmos nin a terra que deixaron é a mesma

Xesús Fraga (Xesús Antón Fraga Sánchez) (Londres, 1971), licenciado en Xornalismo, iniciou estudios de Filoloxía Inglesa en Salamanca. Nacido no barrio de South Kensington, onde pasou a súa primeira infancia, a súa familia trasladouse ao barrio coruñés de Monte Alto e, posteriormente, a Betanzos, de onde é orixinaria. Actualmente traballa como redactor na sección de Cultura do periódico "La Voz de Galicia". Como narrador publicou os libros de relatos "Tute para catro" (Xerais 2000) e "A-Z" (Xerais 2003), ademais da novela "Solimán" (Xerais 2004), pola que obtivo o premio Rubia Barcia-Cidade de Ferrol 2003.